Ko ɗaminiɗen James Webb ina wirnitana en e ɓakdi ɓaleeri?

Lillungal men Fedannde Malaaɗo waɗi ko hakkunde 200 e 400 miliyaar hoodere (naangeeji), kono ina annda kala heen hoodere ko wanngatoonde wuddu lillungal ngal haa fiya feggere, kadi njaaweendi banngagol ngol fawi ko e doole bippogol fooɗngo faade to wuddu to, e mooɓre hoodere nde.
Nde annduɓe ƴeewtindi, ɓe ɓeti njaaweendi koode keewɗe, jeyaaɗe e lillungal men he, ɓe tawi koode ɗee ina ŋakkira mooɓre fotnde deeƴnude ɗe e lappi majje, ɗuum firti ko, ngam ɗe mbaawa heddaade e lappol majje wanngaade wuddu lillungal ngal, ala e sago mooɓre majje ɓura ko njiyeten ko, walla ko ɓetaa ko, ɗuum noon wadde won ko ɗe ndasata ko en mbaawaa yiyde, ko en nganndanaa ooɗoo sahaa.

Ko ɗe ndasata ko wiyete hannde ko ɓakdi ɓaleeri, ko huunde sariinde e faru sabu maa wonoy 27% e denndaangal ko woodi e weeyo.
Teskoɗee: ɓakdi ngoowaandi (matière normale ou baryonique) ko 5% e faru.
Hay gooto anndanaa ɓakdi ɓaleeri ko ɓuri famɗude, kayri fof e wejaade e ngoo weeyo, kono eɗen ɗamini maa niiwnorgal James Webb wallu en e faamde ngonka mayri sabu batte mayri e ɓakdi ngoowaandi njiyotoondi.

Maa niiwnorgal ngal ɓam nate laaɓtuɗe, ngal holla en nokkuuji ɗo lilluɗe goɗɗuɗe ooñaa no bafɗi ni, tawi ko cooynam tan, waɗata noon ko tawa e yolnde he ina waɗi lilluɗe goɗɗe mawɗe ɓadondirɗe, mooɓre majje ooña cañu weeyo e wono ngoo, haa ko sooyna caggal ɗeen lilluɗe fof ko maa waylo e mbaadi, waya no ko ooñi nih, tawa ooñaaki, kadi ina walla en laaɓtin’de ko woɗɗi, ɗuum waɗi en wiyde ɗum laaɓtinooje fooɗngo walla Anistayn.
So mooɓre ɓakdi ngoowaandi ɗeen lilluɗe gonɗe e yolde he anndaama, maa addan en anndude mooɓre ɓakdi  ɓaleeri coomiindi heen.
Ɗuum wonata ko taaɓal moolanangal e ɓeto ndiin ɓakdi e etaade faamde no ndi sarori e faru.

So e ƴeewtindiima natal gadanal ngal James Webb nultiri, ngaal woni, weeyo luggo (deep field ), ma en njiy heen diidi boɗeeji ooñiiɗi, walla pate boɗeeje ɗeɓɗe hofaade, ɗuum ko lilluɗe goɗɗuɗe (hedde duuɓi miliyaaruuji 13 lewndu), wonaa mbaadi majje, ko mooɓre lilluɗe goɗɗe ɓurɗe ɓadaade (hedde duuɓi miliyaaruuji 4,6 lewndu)yanti e mooɓre ɓakdi ɓaleeri coomndi ɗe nde wayli cooynam majje.

Haa jooni de, so en ƴeewtindioma natal ngal, maa wallu en e faamde ɗiirtagol faru, wadde e anndude yakawere ɓaleere (énergie noire), nde tawno faru seeraani e ɓeydaade baŋ yoo baŋ, kono doole petooje ɗum nganndanaaka hay dara.

5 commentaires sur “Ko ɗaminiɗen James Webb ina wirnitana en e ɓakdi ɓaleeri?

  1. Ceerno Hammadi Jah ganndo ganndinɗo Fulɓe ganndal weeyo haa natti wonde sikke !
    Miin hoore am dee, miɗo weltii e nguurndam Hammadi Jah. Sabu ko ngartam wonande leñol Fulɓe, walla wonande Afriknaaɓe.
    Ko ɓuri kadi yooɗde-mi e gollooɓe hono ɗee ɗoo golle (hono Hammadi Jah’en, Ibraahiima Malal Saar’en, Pullo Gaynaako’en e yahduɓe e maɓɓe kala) , kamɓe ko yimɓe huuñitiiɓe ganndal e nder ɗemɗe goɗɗe, kono ngal maɓɓe ngal eɓe yeeso kala ɗemngal.
    Ko ɗuum famminta en ndeka gooto emen kala ko janngi ganndal, ina haani ngaal ganndal wona e ɗemngal mum.
    Waɗde enen, ko kaan-ɗen ko tiiɗnaade e maɓɓe, e teddinde-ɓe, e ñaaganaade-ɓe nguurndam njuutɗam e battande moƴƴe.
    Sabu eɓe mbaawnoo waɗde no woɗɓe jannguɓe ɗemɗe koɗe keddii e moɗeede e nder ɗeen ɗemɗe keewi waɗde nii, kono Geno daɗndiiɓe heen, kadi daɗndanii en ɓe heen. Waɗde ɗuum ko yettude Geno no feewi sanne !
    Ceerno Hammadi Jah yoo Joomiraaɗo juutnu nguurndam maaɗa, moƴƴina battande maa.

    J’aime

  2. Seydi jah Yoo mojjere Geno yetto on aan E denndaangal ceeren6e anndinoo6e leñol Ngo on pinndinii on paamni yoo Geno selline semmbina rokka on sagooji men E leñol men brake Geno E nelaado men sws KO Kono Anne a jaraama min ngala njettoor ma KO Geno tan jogii njoydi mon yoo yo6 on mojjer a jaraama pullo handed haa janngo ha 6aaw janngo yo Geno juutnu ha juuta wonda cellal mida weltii haa no feewi sanne a jaraama jah

    J’aime

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s