Lappi Artemis, ruttaade to Lewru e yeesu mum

Ñalnde altine 29 juko ()août NASA ina jogori lottude laana ka jolnaani yimbe faade to Lewru, e eɓɓoore lappol biyetengol Artemis, lottata laana kaa ko lottirgal (fusée) ɓurngal doolnude e Aduna, SLS (Space Launch Systen: Yuɓbo lotto to weeyo), nisre maggal ko tonuuji 2600, tooweendi maggal ko meetereeje 98.

Woni faandaare maɓɓe ko ƴeewndo, e nder balɗe 42, laana ka seraaji Lewru, ka diwnee ɗo ɓadii Lewru tawa ka jolnaani hay gooto, hade maɓɓe jolnude yahweeyo en tuggi hitaande 2024,

Hay gooto jolataa heen ngol laawol, kono maa ɓe njolnu e makka gaane (mannequins), ɓe ñemmba heen terɗe yimɓe, ngam ƴeewndaade ko heedanta neɗɗo e ciiñsiiñƴe lorlooje iwooje to Naange e weeyo no ngollirta, mbela terɗe ɗee ina kaɗtani hartaango (acceélération) laana ka, hol ko ɗum battinta e majje e ɓanndu neɗɗo, sabu woni faandaare ndee, ko nawtude aadee to.dow Lewru e lappol Artemis 2,

Ñalnde Altine maa lottowal ngal lottu laana Oriyon (Orion) wanngaade Lewru ɗo ɓadii ndu, ɓaawo ɗuum ka arta e wertaango ɗaŋre men ndee, lappol ƴeewndo ngol timma.

So ƴeewndo ngoo feewi, woni mappol Artemis 1, maa yahweeyo en njolne, nawee to Lewru hitaande 2024, ɗuum wonata fuɗɗoode lappol Artemis 2, kono haaɗaani ɗoon, sabu yimɓe (worɓe e rewɓe) maa nawe toon e lappol Artemis 3 ɗo e 2025, ina waawi ni ɓe ɓenna Lewru faade to ɗaŋre Mbaañ (Mars), ko heen debbo gadano, e gorko ɓaleejo gadano nawete Lewru.
Ɓaawo ɗuum yimɓe nawee to ɗaŋre Mbaañ, ngam ndarna toon cuuɗi gollorɗi ganndal, koɗa e ɗaŋre woɗnde, nde en ngoowaani,

Neɗɗo wayritii Lewru ko e lappi Apollo, lappol majji baɗtindiingol ko 1972 wonno,
Yahweeyo en ngoni ko e heblanaade lappol kesol ngol gila e jooni, eɓe kuutoro jooni ñeemtino werla keborɗo naweede to Lewru, ngam ɓe ekko dognude ɗum, yanti heen ɓe mutda e kaɓirɗe maɓɓe e nder biide ndiyam ngam ñeemtin’de ngonka to Lewru, ndiyam ɗam wallataɓe ko hoyde haa tolno e semmbe fooɗngo Lewru, ɓe usta kadi pooye maɓɓe haa ñemmba niɓɓere ɗo ɓe kebori jippaade e Lewru ɗo, ɗoon woni soɓɓundu worgo mayru,

Lottowal lappol Artemis 1 dariima e dingiral lottirgal, ngaal woni.dingiral weeyoyal Kennedi (centre spatial Kennedy), ngam ngal diwa, so yaawi, 29 juko (août), so woodi ko haɗi, waɗte 2 walla 5 siilto (septembte).