Daawe lappol Artemis 1

Artemis 1 rewata ko e lappol Apollo 8 rewno faade to Lewru, kaan woni laana ngadiika jolnude yimɓe faade to seraaji Lewru e bowte 1968.
Laana Oriyon njogorka lotteede ñalnde hoore biir (aset) ka maa yawtu Lewru fotde ujunnaaje capanɗe kilomeeteer.
Maa ka wallitoro fooɗngo Lewru ngam ɓeydotoraade njaaweeki, haa ka yawta Lewru fotde 70 000 kilomeeteer.

Lottirgal (fusée) SLS feewnira ko mbela waawa rimndude e lottude ko ɓennata taarol ɓadingol Ngaawe, nawora kaake e yimɓe to Lewru walla ɗaŋre Mbaañ.
Lottirgal ngal ko moolanangal e mawnude, ko foti noon meeɗaa feewneede, ngal waɗi ko bamɗi (moteur) 4 mawɗi keewɗi semmbe, e dampooje (propulseurs) 2 ballitooje, ko ɗuum ɗakkitta ngal e leydi faade to weeyo.

Ko e nder leƴƴanɗe 90 lottirgal ngal hawrata e waraango henndu wiimtawre ɓurngo doolnude.
So ngal seerti e dampooje ceŋiiɗe, ko ɗoon alluuje kuurnooɗe laana kaa koɓɓitto, yuɓɓo darnitoowo lottugol seertee, bamɗi (moteurs) korwal hakkunde ngal ndarto, korwal ngal seŋto laana kaa.

Laana Oriyon kaa jokka wanngaade ɗaŋre men Ngaawe, ka sorta alluuje maggal naange, ko ɗoon mbabba ndampoowa korwal ɗiɗmal ngal huɓɓata ngam heñaade e nawde laana kaa to Lewru,

So waktu e hojomaaji 50 fawiima e ummagol e leydi, laana kaa seerta e korwal ɗiɗmal ngal, ka heddoree wulnde duuyso (module de service), ka jokka laawol faade to Lewru, ko e balɗe 4 ka taƴcitta yolnde 394 500 kilomeeteer hakkunde men e Lewru, ka yaaɓana wallitoraade fooɗngo Lewru.
Ka wirto Lewru ɗo ɓadii : 100 km hade makka roontaade.

So balɗe 20 timmi, laana Oriyon kaa waɗtee e laawol roontaade Ngaawe.
Balɗe 5 pawotoo heen, laana ka seerta e wulnde mum, ka wonta bellella, heddoto tan ko laalagal laana ngal, ka yaaɓana naatde wiimtawre (atmosphère) Ngaawe.
Gila ɗo ka naatata e wiimtawre ndee, haa ka sorta paali makka paaraasiteeje, haa ka mema maayo fof hawrata ko hojomaaji 30.

Ina jeyaa e paandale lappol ngol, ƴeewndaade tennggaade faddorde nguleeki laalagal laana kaa, njaajeendi ndeen tenngaade ko meetereeje 5, ngam heɓde taƴoral e nde hattani njaaweeki 40 000 km/h e tolno nguleeki 2800°C.
Ɗo laana kaa hokkiti faade leydi ɗoo, maa wiimtawre ndee ustu njaaweeki makka haa 480 k/h, paaraasiteeje ɗee ne lomlomtondira fetaade haa usta njaaweeki makka haa tolno 32k/h.
Rewata heen tan ko yan’de e ndiyam e maayo wuro Saan Jeego.
Laana ndiyam mawka arana ka.

Gaanal (mannequin) biyetengal Moonikin Kampos lomtinaa e joɗnde mawɗo lappol, ngal ɓoorna koltu NASA kesu, a ngal ɓama doole hartaango (accélération) e siññere heɓtiinde ngal heen.
Ina jeyaa ko jolna e laana Oriyon kaa, ngaanon ɗiɗon, Helga e Sohar (Zohar), kon peewnira ko ɓakdi ñemmbundi ƴiye yimɓe e terɗe mumen, heen gootel maa ɓoorne ko ina heedana ɗum e ciiñsiiñƴe lorlooje, keddingel ngel wona foppoldu, kaɓirɗe ɓetooje tolno ko yani e makkon e ciiñsiiñƴe lorlooje ceŋaa e makkon, ngam ɓe kumpito, teeŋti to weeyo, demba lommbere, to ɗe ɓuri doolnude to.

Natirɗe (caméras) keewɗe ndaarooje no lappol ngol yahrata mbaɗaa e laana he, no jolnaaɗo yiyrata toon, ko yiyata, natirɗe goɗɗe mbaɗaa e kommbol alluuje naange ngam ɗe nata laana kaa won’dude e Lewru e Ngaawe caggal makka.

2 commentaires sur “Daawe lappol Artemis 1

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s