Haayre Apofis yuman bone e firtaare

Haayre weeyo Apofis ko anndaande no feewi, kadi nde seeraani e sunneede e wiɗteede gila nde yiya hitaande 2004. Waɗi yimɓe waɗtude e mayre hakkile ko ɓadogol mayre pakitngol ɗaŋre men Ngaawe e nder hitaande 2029, noppi kay ko dariiɗi, kulhuli ina keewi, nde tawno haala ina heewi e mayre, hay e jeewte ɗe annduɓe men fulɓe mbaɗata joo e joo fof ceeraani e haalde nde, kono yowaade e jiyɗe ceeɓɗe annduɓe weeyo e ñemmbo lappol mayre e nder kaɓirɗe ɓurɗe seeɓde, eɗen mbaawi wiyde: woto kulen woto paayen, haayre dillinoore mawɓe faaynoore annduɓe mawɓe maa ɓado en kono nde deŋkotaako e ɗaŋre men.
Aynude kaaƴe weeyo kayhaytooje seraaji ɗaŋre men Ngaawe ko haaju ganndal weeyo hannde, ɗum ko ngam heblude peeje falaade ɗeen kaaƴe ɗe mbaasa yan’de e ɗaŋre men, Apofis jeyaa ko ɗeen kaaƴe kulɓiniiɗe, sabu mawnugol mayre e lappol mayre, maa tekkeendi mayre wonoy 335 meeteer, lappol mayre ina ɓadii lappol Ngaawe, ko ɗe dewondirɗe to ɓadii, ko dogata noon so renndii lappol e ko dogata, so reenaaki meeɗat felɓondirde, maa haayre ndee wirto en to ɓadii ñande 13 avril 2029, sabu maa nde ñoos e men haa 37399 kilomeeteer, limoore ndee ina mawni, kono ina famɗiri jolɗe weeyo, ko noon kam so tawii nde waylaani lappol.
Ndeen yolnde ɓurata ɓadaade e yoga e jolɗe hakkunde men won e beeyweeye tiimtolnooje (satellites géostationnaires), wadde ko fartaŋŋe mbo weeɓaani hawrude e haayre weeyo tawa wonaa abbaade, maa annduɓe weeyo keɓ heen ganndal keewngal, gila e geɗe mahɗe nde haa sifaa dogdu mayre.
Ngoƴa ka njogikoɗen e kuljuli yan’de haayre ndee e dow ɗaŋre men kam natti, hiisa lappol mayre fawaade e no nde yiyra hollitii won’de nde jogoraani yan’de e dow leydi ɗoo e duuɓi teemedere garooji.
Kono so hoddiraama Apofis felɓondiri e haayre weeyo woɗnde ina waawi ɗuum wayla lappol mayre, nde faya e ɗaŋre men walla nde saytira bannge goɗɗo, ko kaan ngoƴa addani toppitiiɓe aynude kaaƴe weeyo rewindaade  lappi ko ina abbo e miliyoŋ e 300 000 haayre weeyo haytoore, hade woodde e majje feriinde Apofis wayla kuccam mayre, to ɗaŋre men.
Annduɓe weeyo ina keppa ko nde ɓadotoo haa ɓe mbaawa wiɗtude geɗe mayre hade nde yawtude, hitaande 2029, maa ɓe mbiɗtu yoga e ko abbiti e mayre, mbaadi, wertaango, mahngo, lappol, njaaweeki, e ko nanndi heen.