Lillungal koode

Lillungal koode ko dental koode e duule heno e punndi, ɗe fooɗngo mooɓondiri. Ko ɗe jirlotooɗe ɗe meeɗaa darto, ɗuum waɗi won e firooɓe mbiyata jiryirngal, eɗe moolanaa mawneeki sabu eɗe ngonoya duuɓi ujunnaaje lewndu.
Adan, nde ganndal koodiwal fuɗɗi yiyteede, annduɓe teskiima cukkiri koode e asamaan, sabu lappol danayol ina ummi worgo ina roondi rewo, fecciti asamaan, ina haawi ɓe no feewi, hay enen fulɓe eɗen teskii ngol, teskodiɗen ngol e geɗe men nguurndam, wiye to bannge Fuuta Tooro, so tawii neɗɗo leliima ngol waɗti tiimde e reedu mum tan ŋaale njonti, gese ɓenndi e geɗe goɗɗe.
Ko lappol laaɓtungol teeŋti e gorlal Bojel (so ndoogu alaa kaɗooje).
Anduɓe koode puɗɗi faamde lappol ngol ko dental koode woni ɗoon, dental ngal njeyaɗen e nder mum, sabu Naange ko hoodere e koode maggal, kadi biyeteeɗi Edwin Hubble hedde 1929 yiyti lilluɗe goɗɗe keewɗe haa fakiti, wadde Lillungal men yanti tan ko e lilluɗe goɗɗe e nde weeyo he.

Lilluɗe ina keewi mbaadiiji, kono ko ɓuri heewde e majje ko beɗiije, baɗɗe faandu laaɓtundu to hakkunde to, to seraaji ɗeen lilluɗe ko calti calti ooñiiɗi waɗi, koode kese ina petta heen, won e majje baɗɗde buulol punndi e heno, ɗeen lilluɗe mbiyete Lilluɗe buule (spirale barrée), to faandu too koode nayeeje ɗee tawete. Lilluɗe beɗiije ko foti no miliyaaruuji 10 haa 100 ina tawee e majje, ko famɗi fof hoodere wootere hesere ina fetta heen e nder hitaande won heen ko 1000 hoodere hesere ɓeydoto e nder hitaande.
Lillungal men Fedannde Malaaɗo, ko e lilluɗe hee jeyaa, kono nde tawno ko e maggal njeyaɗen ina saɗtani en anndude mbaadi maggal goobu maggal haa e mooɓre ndee.
Yuɓɓo Naange men woni ko sera e Lillungal he, hakkunde men e wuddu maggal maa wonoy fuuɓi 26000 lewndu, e nder caltol yooli (bras d’Orion). Fawaade e cooynam lilluɗe goɗɗe, Lillungal men ko mbeɗiwal, ngal njaajeendi mum wonoyi duuɓi 100 000 lewndu, ko famɗi fof a ngal mooɓi 200 miliyaar hoodere.
Mbiyɗen ko miliyaaruuji lilluɗe koode ngoni e tageefo ngoo, bas yoo baŋ, dente moolanaaɗe yuɓɓude e sañaade, ɓuri ɓallaade en e ɗeen lilluɗe ko Jaɓɓal (Andormède), yolnde hakkunde men e maggal maa abbo e miliyoŋaaji ɗiɗi e feccere lewndu, so hawri e asamaan ina laaɓi ooyre maggal ina yiyre gite ɓole, kono kala kuutoriiɗo lonngorgal maa laaɓtindo ngal.
Ɗoo e duuɓi miliyaaruuji 5 paaɗi, maa Lillungal men yantondir e Lillungal Jaɓɓal, ɗe laato Lillungal gootal berbal ooñingal.

Kuɗol : Hammadi Jah
18-03-2024

Lillungal men Fedannde Malaaɗo